ភ្នំពេញ, ថ្ងៃទី១ ខែមេសា ឆ្នាំ ២០២៦, គ្រឹះស្ថាន អម្រឹត បានសហការជាមួយ សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) ក្នុងការចាប់ផ្តើមកម្មវិធីមួយ ដើម្បីលើកកម្ពស់ការអាន និងការយល់ដឹងអំពីប្រវត្តិសាស្រ្តរូបិយវត្ថុខ្មែរ សម្រាប់កុមារនៅទូទាំងប្រទេសកម្ពុជា។

កម្មវិធីនេះមានគោលបំណងផ្តល់ឱកាសដល់កុមារចំនួនប្រមាណ ១០,០០០ នាក់ មកពីតាមបណ្ដាខេត្ត និងរាជធានីភ្នំពេញ ឲ្យបានចូលរួមសិក្សា និងស្វែងយល់អំពីប្រវត្តិសាស្រ្តរូបិយវត្ថុខ្មែរ តាមរយៈបទពិសោធន៍ផ្ទាល់នៅសារមន្ទីរ ស.ស.រ។

សារមន្ទីរ ស.ស.រ គឺជាសារមន្ទីរទំនើប និងជាលើកដំបូងនៅកម្ពុជា ដែលផ្តល់នូវចំណេះដឹងជ្រាលជ្រៅអំពីទំនាក់ទំនងរវាងសេដ្ឋកិច្ច រូបិយវត្ថុ និងនយោបាយក្នុងបរិបទប្រវត្តិសាស្រ្តនៃប្រទេសកម្ពុជា។

តាមរយៈការសហការនេះ គ្រឹះស្ថាន អម្រឹត និង សារមន្ទីរ ស.ស.រ មានបំណងរួមចំណែកក្នុងការបង្កើនចំណេះដឹង និងការយល់ដឹងរបស់ជំនាន់ក្មេង អំពីសារៈសំខាន់នៃប្រវត្តិសាស្រ្តសេដ្ឋកិច្ច និងរូបិយវត្ថុ ដែលជាគ្រឹះសម្រាប់ការអភិវឌ្ឍន៍សង្គមនាពេលអនាគត។

អំពី អម្រឹត

បច្ចុប្បន្ន អម្រឹតមានមោទកភាពជាគ្រឹះស្ថានហិរញ្ញវត្ថុឈានមុខគេមួយក្នុងចំណោមគ្រឹះស្ថានហិរញ្ញវត្ថុចំនួន ១០ នៅក្នុងប្រទេសកម្ពុជាដែលផ្តល់ផលវិជ្ជមានដល់សង្គម ។ អម្រឹត បាននិងកំពុងបម្រើអតិថិជនជាង ៦00,000 នាក់ ដែលជា កសិករមានចំណូលទាប សហគ្រាសធុនតូច តូចបំផុត និងមធ្យម ។ អម្រឹតមានសាខាចំនួន១៥០ ក្នុង២៤ រាជធានី-ខេត្តទូទាំងប្រទេស និងមានបុគ្គលិកជាង ៤.៧០០នាក់ កំពុងបម្រើការងារ។

អម្រឹត គឺជាក្រុមហ៊ុនបុត្រ សម្ព័ន្ធរបស់ Bank SinoPac (ធនាគារ សាយណូផេក) គឺជាភាគទុនិកធំនៅក្នុងអម្រឹត រួមជាមួយនឹងភាគទុនិកចំនួន០២ផ្សេងទៀតដែលជា ស្ថាប័នអន្តរជាតិ មានកិត្តិនាម និងត្រូវបានទទួលស្គាល់ថាជាស្ថាប័នដែលមានភាពច្នៃប្រឌិត និងទំនួលខុសត្រូវខ្ពស់ផ្នែកសង្គម ។ ក្នុងដំណើរវិវត្តន៍ និងការរីកចម្រើនរបស់ខ្លួន អម្រឹត បន្តបំពេញបេសកកម្មក្នុងការផ្តល់សេវាហិរញ្ញវត្ថុដែលស្របតាមតម្រូវការចាំបាច់របស់អតិថិជន៕