ភ្នំពេញ, ថ្ងៃទី ០៤ ខែមីនា ឆ្នាំ ២០២៦ – គ្រឹះស្ថានមីក្រូហិរញ្ញវត្ថុ អម្រឹត បានរៀបចំកម្មវិធី «Amret Fun Run ដើម្បីសប្បុរសធម៌» ដែលជាផ្នែកមួយនៃកិច្ចប្រជុំគណៈគ្រប់គ្រងប្រចាំឆ្នាំ ២០២៦។ កម្មវិធីនេះត្រូវបានផ្តួចផ្តើមឡើងក្នុងគោលបំណងបន្តចូលរួមចំណែកគាំទ្រ និងជួយសម្រាលបន្ទុកដល់ប្រជាជនភៀសសឹក និងកុមារតូចៗ ដែលរងផលប៉ះពាល់ពីសង្គ្រាមតាមបណ្តោយព្រំដែនកម្ពុជា-ថៃ និងកំពុងរស់នៅក្នុងជំរុំភៀសសឹកនៅឡើយ។

កម្មវិធីនេះមានការចូលរួមពីបុគ្គលិកថ្នាក់គ្រប់គ្រងប្រមាណជាង ៥០០ នាក់ ដែលបានរួមគ្នារត់ក្នុងកម្មវិធី «Amret Fun Run ដើម្បីសប្បុរសធម៌» និងធ្វើការបរិច្ចាគថវិកាស្ម័គ្រចិត្ត ដើម្បីគាំទ្រដល់ប្រជាជនភៀសសឹក និងកុមារតូចៗដែលកំពុងប្រឈមនឹងការលំបាកក្នុងជីវភាពរស់នៅ។

ជាមួយគ្នានេះផងដែរ អម្រឹត និងបុគ្គលិកទាំងអស់ តែងតែបន្តចូលរួមចំណែកយ៉ាងសកម្មក្នុងសកម្មភាពសប្បុរសធម៌ និងសង្គម តាមរយៈការបរិច្ចាគជាថវិកា ការផ្តល់សម្ភារៈប្រើប្រាស់ចាំបាច់ និងការសហការជាមួយអាជ្ញាធរពាក់ព័ន្ធ ដើម្បីជួយសម្រាលបន្ទុកដល់ប្រជាជនភៀសសឹកដែលរងគ្រោះ ក៏ដូចជាអតិថិជន និងសហគមន៍ដែលត្រូវការជំនួយ។

តាមរយៈសកម្មភាពនេះ អម្រឹតបន្តបង្ហាញពីការប្តេជ្ញាចិត្តក្នុងការរួមចំណែកអភិវឌ្ឍសង្គម និងការគាំទ្រដល់សហគមន៍ ឲ្យកាន់តែមានសុខុមាលភាព និងអនាគតប្រសើរឡើង។

អំពី អម្រឹត

បច្ចុប្បន្ន អម្រឹតមានមោទកភាពជាគ្រឹះស្ថានហិរញ្ញវត្ថុឈានមុខគេមួយក្នុងចំណោមគ្រឹះស្ថានហិរញ្ញវត្ថុចំនួន ១០ នៅក្នុងប្រទេសកម្ពុជាដែលផ្តល់ផលវិជ្ជមានដល់សង្គម ។ អម្រឹត បាននិងកំពុងបម្រើអតិថិជនជាង ៦00,000 នាក់ ដែលជា កសិករមានចំណូលទាប សហគ្រាសធុនតូច តូចបំផុត និងមធ្យម ។ អម្រឹតមានសាខាចំនួន១៥០ ក្នុង២៤ រាជធានី-ខេត្តទូទាំងប្រទេស និងមានបុគ្គលិកជាង ៤.៧០០នាក់ កំពុងបម្រើការងារ។

អម្រឹត គឺជាក្រុមហ៊ុនបុត្រ សម្ព័ន្ធរបស់ Bank SinoPac (ធនាគារ សាយណូផេក) គឺជាភាគទុនិកធំនៅក្នុងអម្រឹត រួមជាមួយនឹងភាគទុនិកចំនួន០២ផ្សេងទៀតដែលជា ស្ថាប័នអន្តរជាតិ មានកិត្តិនាម និងត្រូវបានទទួលស្គាល់ថាជាស្ថាប័នដែលមានភាពច្នៃប្រឌិត និងទំនួលខុសត្រូវខ្ពស់ផ្នែកសង្គម ។ ក្នុងដំណើរវិវត្តន៍ និងការរីកចម្រើនរបស់ខ្លួន អម្រឹត បន្តបំពេញបេសកកម្មក្នុងការផ្តល់សេវាហិរញ្ញវត្ថុដែលស្របតាមតម្រូវការចាំបាច់របស់អតិថិជន៕