សៀមរាប ថ្ងៃទី ២១ មិថុនា ២០២៥ ៖ ក្នុងនាមជាអ្នកតំណាងគ្រឹះស្ថានមីក្រូហិរញ្ញវត្ថុ អម្រឹត លោក តឹក សុខហេង នាយកប្រចាំតំបន់ខេត្តសៀមរាបនាពេលថ្មីៗនេះបាន​ចូលរួមចែករំលែកសារមួយជូនយុវជន ថា “​ការសរសេរ ពិតជាមានសារសំខាន់ណាស់ លើសពីការអាន” ហើយលោកក៏ បានជំរុញលើកទឹកចិត្តឱ្យយុវជនទាំងអស់ ងាកមកចាប់អារម្មណ៍ការសរសេរ ដើម្បីជាផ្អែកមួយក្នុងការពង្រឹងការតែងនិពន្ធ នឹងឈានទៅសរសេរសៀវភៅ និងអាចបោះពុម្ភផ្សាយបន្ថែមទៀត។

នៅក្នុងឱកាសនេះផងដែរ សិក្ខាកាម ១២រូប ទទួលបានជំនាញសរសេរ ផលិតសៀវភៅ និងការបោះពុម្ពពីក្លិបអ្នកនិពន្ធវ័យក្មេង នៅថ្ងៃទី២១ មិថុនា នៅសណ្ឋាគារម៉េម័រ លើកំណាត់ផ្លូវជាតិលេខ៦ ក្នុងក្រុងសៀមរាបផងដែរ។

ដោយមានបំណងលើកកម្ពស់សមត្ថភាពនៃការសរសេររបស់យុវជន អម្រឹត​បានចូលរួមគាំទ្រកម្មវិធីដោយផ្ទាល់ នៅថ្ងៃទី ២១ មិថុនា នាខេត្តសៀមរាប ដោយវគ្គបណ្ដុះបណ្ដាលនេះផងដែរ គឺមានការចូលរួមពីយុវជនស្រលាញ់ការអាន និងសរសេរ ពីសិក្ខាកាម ១២រូប។

លោក តឹក សុខហេង នាយកតំបន់អម្រឹត នៅសៀមរាប បានលើកឡើងទៀតថា ការសរសេរ គឺជាជំហានសំខាន់មួយក្នុងការផ្លាស់ប្តូរនូវចំណេះដឹង និងការច្នៃប្រឌិត។ លោកបានលើកទឹកចិត្តឱ្យយុវជនខិតខំបង្កើតស្នាដៃសៀវភៅដើម្បីចូលរួម អភិរក្ស អភិវឌ្ឍវិស័យអប់រំ និងវប្បធម៌នៃការអាន។

សិក្ខាកាមដែលបានចូលរួមវគ្គបណ្ដុះបណ្ដាលនេះ នឹងជួបជាមួយអ្នកជំនាញសរសេរព័ត៌មាន និងអ្នកនិពន្ធសៀវភៅ ដែលមានបទពិសោធជាច្រើនលើជំនាញនិមួយៗ ក្នុងនោះមាន លោក គី សុខលីម មានបទពិសោធក្នុងអាជីពសារព័ត៌មានជិត៣០ឆ្នាំ និងជាអ្នកនិពន្ធសៀវភៅ។  លោក លាង ដឺលុច ជាអ្នកនិពន្ធសៀវភៅ និងជាចាងហ្វាងនៃសារព័ត៌មានឌីជីថលថ្មីៗ (ThmeyThmey)  ,លោក Pierre Gillette (ជនជាតិបារាំង) គឺជាអ្នកសារព័ត៌មានជាង៤០ឆ្នាំ និងជាអ្នកនិពន្ធសៀវភៅ។  លោក Alan Kirk (ជនជាតិអូស្ត្រាលី) គឺជាអ្នកសារព័ត៌មានជាង៤០ឆ្នាំ ផងដែរ។ លោក Sonny Krishnan (ជនជាតិអូស្រ្តាលី) គឺជាអ្នកសារព័ត៌មាន និងជាអ្នកជំនាញសំណេរក្នុងវិស័យផ្សេងៗ និងលោកស្រី Michelle Vachon (ជនជាតិអាមេរិក-កាណាដា) គឺជាអ្នកសារព័ត៌មានជំនាញបទយកការណ៍។

សិក្ខាកាមនឹងទទួលបានចំណេះដឹងពីការសរសេរប្រភេទសៀវភៅផ្សេងៗដូចជា ប្រលោមលោក, ប្រវត្តិសាស្ត្រ, វិទ្យាសាស្រ្ត និងការសំភាសន៍, ស្រាវជ្រាវ និងការបោះពុម្ពផ្សាយ។ វគ្គនេះមានរយៈពេល ៦ ខែ និងផ្តល់ជំនាញទាក់ទងនឹងការរចនាសៀវភៅ ការជ្រើសរើសចំណងជើង ការតែងនិពន្ធ និងដំណើរការបោះពុម្ព។

កម្មវិធីនេះ រៀបចំដោយក្លិបអ្នកនិពន្ធវ័យក្មេង ដោយគាំទ្រពីសារព័ត៌មាន ThmeyThmey, អង្គការ AEA Action, សមាគមទេសចរណ៍សៀមរាប និងឧបត្ថម្ភពីអម្រឹត។

ដើម្បីជាការរួមចំណែកដល់សង្គមយើងអោយកាន់តែល្អប្រសើរជាងនេះទៅទៀត អម្រឹតសូមលើកទឹកចិត្តដល់យុវជនទាំងអស់ដែលស្រលាញ់ការអាន សរសេរ បន្តចូលរួមវគ្គបណ្ដុះបណ្តាលនេះបន្តទៀត។​

អំពីអម្រឹត

បច្ចុប្បន្ន អម្រឹត​មាន​មោទនភាព​ជា​គ្រឹះស្ថាន​ហិរញ្ញវត្ថុ​ឈានមុខ​គេ​មួយ​ក្នុង​ចំណោម​គ្រឹះស្ថាន​ហិរញ្ញវត្ថុ​ចំនួន​១0 នៅ​ក្នុង​ប្រទេស​កម្ពុជា​ដែល​ផ្តល់​ផល​វិជ្ជមាន​ដល់​សង្គម ។ អម្រឹត បាន​និង​កំពុង​បម្រើ​អតិថិជន​ជាង​៦00,000 នាក់ ដែល​ជា កសិករ​មាន​ចំណូល​ទាប​សហគ្រាស​ធុន​តូច តូច​បំផុត និង​មធ្យម ។ អម្រឹត​មាន​សាខា​ចំនួន​១៥០ ក្នុង​២៤ រាជធានី​-​ខេត្ត​ទូ​ទាំង​ប្រទេស និង​មាន​បុគ្គលិក​ជាង ៤.៧០០​នាក់ កំពុង​បម្រើ​ការងារ​។

អម្រឹត​គឺជា​ក្រុមហ៊ុន​បុត្រ សម្ព័ន្ធ​របស់ Bank SinoPac (​ធនាគារ សាយ​ណូ​ផេ​ក​) គឺជា​ភាគ​ទុ​និក​ធំ​នៅ​ក្នុង​អម្រឹត រួម​ជាមួយនឹង​ភាគ​ទុ​និក​ចំនួន​០២​ផ្សេង​ទៀត​ ដែល​ជា​ស្ថាប័ន​អន្តរជាតិ​មាន​កិត្តិនាម និង​ត្រូវ​បាន​ទទួលស្គាល់​ថា​ ជា​ស្ថាប័ន​ដែល​មាន​ភាព​ច្នៃប្រឌិត និង​ទំនួល​ខុស​ត្រូវ​ខ្ពស់​ផ្នែក​សង្គម ។ ក្នុង​ដំណើរ​វិវត្តន៍ និង​ការ​រីក​ចម្រើន​របស់​ខ្លួន​អម្រឹត​បន្ត​បំពេញបេសកកម្ម​ក្នុង​ការ​ផ្តល់​សេវា​ហិ​រញ្ញវត្ថុ​ដែល​ស្រប​តាម​តម្រូវការ​ចាំបាច់​របស់​អតិថិជន ​។