ចំណាប់អារម្មណ៍របស់ប្រធានក្រុមប្រឹក្សាភិបាល

នៅក្នុងឆ្នាំ ២០២៣ សេដ្ឋកិច្ចកម្ពុជាមានកំណើន ៥.៣% ដែលកើតចេញពីការងើបឡើងវិញជាបន្តបន្ទាប់ពីវិស័យទេសចរណ៍ ហេដ្ឋារចនាសម្ព័ន្ធ សេវាកម្ម និងជាពិសេស ពីភាពធន់ និងប្រសើរឡើងនៃផលិតកម្មក្នុងវិស័យកសិកម្ម។ ទោះជាយ៉ាងណា ក្នុងវិស័យហិរញ្ញវត្ថុរបស់កម្ពុជា ត្រូវបានសង្កេតឃើញពីការធ្លាក់ចុះនៃគុណភាពទ្រពសកម្ម។ មូលនិធិរូបិយវត្ថុអន្តរជាតិ (IMF) បានលើកឡើងពីកិច្ចការត្រួតពិនិត្យដោយយកចិត្តទុកដាក់បន្ថែមទៀត លើបំណុលរបស់វិស័យឯកជន។ អម្រឹត ក៏ដូចជា វិស័យហិរញ្ញវត្ថុទាំងមូល បានទទួលរងឥទ្ធិពលពីបរិយាសប្រឈមនេះ។ ប៉ុន្តែទោះជាយ៉ាងណា អម្រឹតនៅតែមានមោទនភាពចំពោះការរីកចម្រើនរបស់ខ្លួន ដែលអាចបន្តគាំទ្រ និងបម្រើ អតិថិជនបានយ៉ាងល្អក្នុងរយៈពេលពេញមួយឆ្នាំនេះ។ អម្រឹត ប្តេជ្ញាចិត្តយ៉ាងម៉ុតមាំ បន្តប្រតិបត្តិការអាជីវកម្មរបស់ខ្លួន ប្រកបដោយការទទួលខុសត្រូវក្នុងសង្គម និងផ្តល់គុណតម្លៃសម្រាប់អតិថិជន និងសហគមន៍របស់ពួកគេ។ នេះកើតចេញពីការចូលរួមចំណែកដោយយកចិត្តទុកដាក់ពីសំណាក់បុគ្គលិក និង ដៃគូពាក់ព័ន្ធទាំងអស់។ គុណភាពផលប័ត្រប្រាក់កម្ចី (NPL) នៅក្នុងវិស័យទាំងមូល មានការកើនឡើងក្នុងរយៈពេលពីរឆ្នាំចុងក្រោយនេះ ។ គុណភាព ផលប័ត្រប្រាក់កម្ចី PAR30 កើនឡើងដល់ ៥.៤% (វិស័យធនាគារ) និង ៦.៧៥% (វិស័យមីក្រូហិរញ្ញវត្ថុ)។ ដោយឡែក សម្រាប់គុណភាពផលប័ត្រប្រាក់កម្ចី PAR30 របស់អម្រឹត មានចំនួនត្រឹមតែ ៣% ប៉ុណ្ណោះ គិតត្រឹមខែ ធ្នូ ឆ្នាំ ២០២៣។ លទ្ធផលនេះ គឺបានមកពីការគ្រប់គ្រងឥណទានដោយប្រុងប្រយ័ត្ន និង ប្រសិទ្ធភាពលើការចំណាយប្រតិបត្តិការ ដែលធ្វើឲ្យអម្រឹត ទទួលបាននូវផលចំណេញជាមធ្យម (ROE)ចំនួន ៩.៤% ។
​​​​​​​
ឆ្នាំ ២០២៣ គឺជាឆ្នាំទីពីរនៃការអនុវត្តយុទ្ធសាស្រ្តអម្រឹតរយៈពេល៣ឆ្នាំ "អម្រឹត ឆ្ពោះទៅមុខ" (Amret Forward 2022-2024) ។ យុទ្ធសាស្ត្រនេះ ត្រូវបានអនុម័តដោយក្រុមប្រឹក្សាភិបាល និង មានទិសដៅយុទ្ធសាស្រ្តច្បាស់លាស់ក្នុងការរីកចម្រើនទៅមុខ ប្រកបដោយនិរន្តរភាព កាន់តែមានប្រសិទ្ធភាព ប្រសិទ្ធផល ភាពធន់ រឹងមាំ និងផ្តល់ផលវិជ្ជមានដល់សង្គម។

ពេញមួយឆ្នាំនេះ តាងនាមក្រុមប្រឹក្សាភិបាល ទទួលស្គាល់ពីកិច្ចខិតខំប្រឹងប្រែងរបស់ គណៈគ្រប់គ្រងទាំងអស់ ដែលបានដឹកនាំ រាល់ការអនុវត្តសកម្មភាពជាអាទិភាពនានា ស្របតាមទិសដៅយុទ្ធសាស្រ្ត រួមមាន ការធ្វើឲ្យប្រសើរឡើង និងភាពងាយស្រួល ក្នុងប្រតិបត្តិការអាជីវកម្ម ដោយប្រើប្រាស់នូវ បច្ចេកវិទ្យាទំនើប និងច្នៃប្រឌិត ដើម្បីបម្រើនិងបំពេញតម្រូវការរបស់អតិថិជន។ ដែលកិច្ចការទាំងអស់នឹងបន្តអនុវត្តន៍ក្នុងឆ្នាំ ២០២៤ ទៅមុខទៀត។

កិច្ចការពារអតិថិជន គឺជាអាទិភាពសំខាន់បំផុតរបស់ក្រុមប្រឹក្សាភិបាល និងគណៈគ្រប់គ្រងរបស់អម្រឹត ។ ការប្រកាន់ខ្ជាប់ និង អនុវត្ត គោលការណ៍ ការពារ អតិថិជនក្នុងប្រតិបត្តិការអាជីវកម្មគឺ កាន់តែមានសារៈសំខាន់សម្រាប់អតិថិជនជាពិសេស ក្នុងស្ថានភាពលំបាកនិង ប្រឈមខ្លាំងដែលពួកគេកំពុងជួបប្រទះ។ អម្រឹតបានពិនិត្យឡើងវិញនូវគោលការណ៍ និងនិតិវិធីនៃការដោះស្រាយបណ្តឹង អតិថិជន ដើម្បីរួមចំណែកគាំទ្រដល់ការការពារអតិថិជន ប្រកបដោយការទទួលខុសត្រូវ និង ដើម្បីធានាឲ្យបាននូវការបំពេញការងាររបស់បុគ្គលិក ប្រកបដោយប្រសិទ្ធភាព និងប្រសិទ្ធផល។
វិស័យហិរញ្ញវត្ថុរបស់ប្រទេសកម្ពុជា បាននិងកំពុងឆ្លងកាត់នូវដំណាក់កាល នៃការផ្លាស់ប្តូរបែបឌីជីថល ការវិវឌ្ឍន៍យ៉ាងឆាប់រហ័សនៃសេវាហិរញ្ញវត្ថុតាមឌីជីថលដែលកាន់តែមានការកើនឡើងយ៉ាងខ្លាំង។ ធនាគារជាតិនៃកម្ពុជា បាននិងកំពុងដើរតួនាទីយ៉ាងសំខាន់ក្នុងការជំរុញឲ្យសេវាហិរញ្ញវត្ថុតាមបែបឌីជីថលទៅដល់ប្រជាជនកម្ពុជា ជាពិសេសដល់ប្រជាជនដែលមិនទាន់ទទួលបានសេវាហិរញ្ញវត្ថុគ្រប់គ្រាន់ពីធនាគារគ្រប់គ្រាន់និងពេញលេញ។ ការដាក់ឱ្យដំណើរការជាផ្លូវការនូវប្រព័ន្ធ ខេអេចឃ្យូអរ (KHQR) ដើម្បីផ្តល់ភាពងាយស្រួលដល់ការទូទាត់ការចំណាយ ឆ្លង គ្រឹះស្ថាន ធនាគារ និងហិរញ្ញវត្ថុដែលជាសមាជិករបស់ប្រព័ន្ធបាគង គឺជាសមិទ្ធផលមួយដែលទទួលបានជោគជ័យយ៉ាងខ្លាំងរបស់ធនាគារជាតិនៃកម្ពុជា ក្នុងយុគសម័យឌីជីថលនេះ។

អត្រានៃការប្រើប្រាស់ទូរស័ព្ទស្មាតហ្វូននៅក្នុងប្រទេសកម្ពុជាមានកំណើនខ្ពស់គួរកត់សម្គាល់ ក្នុងចំណោមបណ្តាលប្រទេសនៅលើពិភពលោក។ ប្រជាជនជាង ២២ លាននាក់ បាននិងកំពុងប្រើប្រាស់ទូរស័ព្ទដែលមាន តភ្ជាប់នូវអ៊ីនធឺណែត ស្មើនឹង ១៣១.៥% នៃចំនួន ប្រជាជន សរុប។

ក្នុងរយៈពេលប៉ុន្មានឆ្នាំចុងក្រោយនេះ អម្រឹតបានចាប់ផ្តើមវិនិយោគជាច្រើនលើប្រព័ន្ធបច្ចេកវិទ្យានិងឌីជីថល។ នេះមិនត្រឹមតែឆ្លុះបញ្ចាំងពីការប្តេជ្ញាចិត្តរបស់ អម្រឹត ក្នុងការការអភិវឌ្ឍន៍ប្រព័ន្ធបច្ចេកវិទ្យា បែបឌីជីថល ច្នៃប្រឌិត ដើម្បីបម្រើអតិថិជនឱ្យកាន់តែមានប្រសិទ្ធភាពប៉ុណ្ណោះទេ ប៉ុន្តែថែមទាំង បង្ហាញពីការចូលរួមចំណែករបស់អម្រឹត នៅក្នុងចូលរួមកំណើនសេដ្ឋកិច្ចជាតិ លើកកម្ពស់ បរិយាបន្នហិរញ្ញវត្ថុ និងរួមចំណែកគាំទ្រដល់យុទ្ធសាស្រ្តរយៈពេលវែង របស់រដ្ឋាភិបាល ស្តីពី "ក្របខ័ណ្ឌគោលនយោបាយសេដ្ឋកិច្ច និងសង្គមឌីជីថល ២០២១-២០៣៥” ។ គោលនយោបាយនេះ មានគោលបំណង កសាងសេដ្ឋកិច្ច និងសង្គមឌីជីថល ដើម្បីរួមចំណែកគាំទ្រកំណើនសេដ្ឋកិច្ចថ្មី។ អម្រឹតបាននិងកំពុងបន្តយកចិត្តទុកដាក់យ៉ាងខ្លាំង ក្នុងការកសាង និងអភិវឌ្ឍសមត្ថភាព និង ទេពកោសល្យសម្រាប់បុគ្គលិក។ នេះគឺជាគោលដៅយុទ្ធសាស្រ្តសំខាន់មួយ ដើម្បីគាំទ្រ និង ជម្រុញពួកគេ ចាប់យកឱកាសការងារ នាពេលអនាគត តាមរយៈការផ្តល់ឱកាសបុគ្គលិកចូលរួមវគ្គបណ្តុះបណ្តាលនានាទាំងក្នុងនៅក្រៅប្រទេស ដូជា ការចូលរួមក្នុងកម្មវិធីបណ្តុះបណ្តាល របស់ក្រុមហ៊ុន Advans group សហការជាមួយវិទ្យាស្ថាន EDHEC នៅទីក្រុងប៉ារីស។ អម្រឹត ជឿជាក់លើសក្តានុពល ភាពច្នៃប្រឌិត និងទេពកោសល្យរបស់បុគ្គលិកក្នុងការរួមចំណែកជំរុញការរីកចម្រើនអាជីវកម្ម។ អម្រឹត បន្តស្វែងរបេក្ខជន ដែលមានទេពកោសល្យ សមត្ថភាព ចំណេះ និងជំនាញក្នុងអាជីព។ អម្រឹត បង្កើតបរិយាកាសការងារល្អ និង ផ្តល់ឱកាសស្មើរៗគ្នាដល់បុគ្គលិក ក្នុងការបណ្តុះបណ្តាល ដើម្បីឲ្យពួកគេកាន់តែមានការ រីកចម្រើនក្នុងអាជីពការងាររបស់ពួកគេ ដើម្បីឲ្យពួកគេក្លាយជាបុគ្គលិកគ្រប់គ្រង បន្តវេន។ ឆ្នាំ ២០២៤ ក៏នឹងរំពឹងថាជាឆ្នាំដែលត្រូវជួបនឹងបញ្ហាប្រឈមនានា។ ទោះជាយ៉ាងណា អម្រឹត ជឿជាក់ថា នឹងអាចចាប់យកឱកាសថ្មីៗ ដើម្បីរីកចម្រើនបន្ថែមទៀតប្រកបដោយការទទួលខុសត្រូវ និងនិរន្តរភាព ។ អម្រឹត បេ្តជ្ញាបន្តចូលរួមចំណែកក្នុងការអភិវឌ្ឍន៍សេដ្ឋកិច្ចកម្ពុជា។

តាងនាមក្រុមប្រឹក្សាភិបាល សូមអរគុណនិងកោតសរសើរដល់ភាគទុនិកទាំងអស់ ដៃគូ និងអជ្ញាធរពាក់ព័ន្ធ ជាពិសេសធនាគារជាតិនៃកម្ពុជា សម្រាប់ ការណែនាំជាយុទ្ធសាស្ត្រ និង គាំទ្រទាំងឡាយ។ អម្រឹត សូមអរគុណចំពោះបុគ្គលិកគ្រប់រូប សម្រាប់ការលះបង់ ការប្តេជ្ញាចិត្ត និងការខិតខំប្រឹងប្រែងរួមគ្នាដើម្បីបម្រើអតិថិជនរបស់យើងប្រកបដោយទំនួលខុសត្រូវ ជាពិសេក្នុងស្ថានភាពដ៏លំបាកនិងប្រឈមក្នុងរយៈពេលប៉ុន្មានឆ្នាំចុងក្រោយនេះ ជាពិសេស ចំពោះអតិថិជនទាំងអស់ សម្រាប់ ទំនុកចិត្ត និងការគាំទ្រមកដល់អម្រឹត។ អម្រឹត ប្តេជ្ញាបន្តខិតខំបម្រើ ផ្តល់គុណតម្លៃ ដើម្បីបំពេញតម្រូវការ និងការរំពឹងទុករបស់អតិថិជន។
ឆ្ពោះទៅមុខ អម្រឹត នៅតែជាគ្រឹះស្ថានហិរញ្ញវត្ថុមួយដែលបម្រើ ផ្តល់គុណតម្លៃ និង ផលវិជ្ជមានដល់អតិថិជន សហគមន៏ ភាគីពាក់ព័ន្ធនិងសង្គមជាតិទាំងមូលប្រកបដោយនិរន្តរភាព។

Claude FALGON
ប្រធានក្រុមប្រឹក្សាភិបាល, អម្រឹត